ՀԱՅԿԱԿԱՆ ԳՐՉՕՋԱԽՆԵՐ

Հայ գրչության կենտրոնները ներկայացնող, իր նախադեպը չունեցող ժամանակակից տեխնիկական լուծումներով և դրանց բաղադրիչ միջոցներով հագեցած այս նախագիծը կյանքի է կոչվել Մատենադարանի երկարամյա գործընկեր կազմակերպությունների՝ Գալուստ Կյուլպենկյան հիմնարկության և «Ավրորա» մարդասիրական նախաձեռնության աջակցության շնորհիվ:

Մատենադարանի այցելուներն այսուհետ հնարավորություն ունեն նորագույն տեխնոլոգիաների միջոցով ծանոթանալ հայ գրչության նշանավոր կենտրոններին, զուգահեռաբար՝ հայկական միջնադարյան վանքերին ու եկեղեցիներին, ինչպես նաև այդ վայրերում ստեղծված ձեռագրական հարուստ ժառանգությանը:

Հայկական գրչության կենտրոններին նվիրված քարտեզը նախ և առաջ հայկական ձեռագրական արվեստի և ընդհանրապես հայ քաղաքակրթական և մշակութային քարտեզն է: Այն ցույց է տալիս հայ միջնադարյան մշակույթի տարածվածությունն ինչպես բուն Հայաստանում, այնպես էլ նրա սահմաններից դուրս՝ հայկական գաղթօջախներում:

Մեկ հպումով բացվող քարտեզների, վանքերի ու եկեղեցիների լուսանկարներն ու մանրանկարչական պատկերները խոստանում են արագ, մատչելի տեղեկատվություն և անչափ հետաքրքիր ճանապարհորդություն հայերեն ձեռագրերի աշխարհում:

«Ավրորա» մարդասիրական նախաձեռնությունը, որն ստեղծվել է Հայոց ցեղասպանությունը վերապրողների անունից՝ ի երախտագիտություն նրանց փրկողների, ձգտում է հնարավորություն տալ մերօրյա հերոսներին՝ կյանք եւ հույս պարգեւել նրանց, ովքեր մարդասիրական աջակցության խիստ կարիք ունեն ողջ աշխարհում, այսպիսով՝ շարունակել մարդասիրության շղթան աշխարհով մեկ: «Ավրորա» մարդասիրական նախաձեռնությունը գործով արտահայտված երախտագիտություն է: Այն նպատակ ունի ութ տարի շարունակ (2015-2023թթ.՝ ի հիշատակ ութ տարի տեւած Հայոց ցեղասպանության՝1915-1923թթ.) աջակցել մարդկանց, ովքեր վտանգելով իրենց կյանքը` կնպաստեն այնպիսի համաշխարհային նախագծերի իրագործմանը, որոնք կբարելավեն առավել կարիքավոր եւ աղքատ մարդկանց կյանքը: Սա իրագործվում է նախաձեռնության տարբեր ծրագրերի օգնությամբ՝ «Ավրորա» մրցանակ, Aurora Dialogues քննարկումների շարք, «Ավրորա» մարդասիրության ցուցիչ, Երախտագիտության նախագծեր եւ 100 LIVES ծրագիր:

Գալուստ Կիւլպէնկեան Հիմնարկութիւնը ստեղծվել է 1956 թ. Պորտուգալիայում՝ Գալուստ Սարգիս Կիւլպէնկեանի վերջին կտակի համաձայն: Կիւլպէնկեանը ծնվել է 1869 թ. Ստամբուլում և իր կյանքի մեծ մասն անցկացրել Լոնդոնում և Փարիզում: 1942 թ. մեկնել է Լիսաբոն, որտեղ էլ մահացել է 1955 թ.: Այդ ժամանակ նա համարվում էր աշխարհի ամենահարուստ մարդը:

Գալուստ Կիւլպէնկեան Հիմնարկութիւնը ստեղծվել է որպես մնայուն հաստատություն, հիմնական նպատակ ունենալով կյանքի բարելավումը արվեստի, բարեգործության, գիտության և կրթության միջոցով: Հիմնադրամն իր գործունեությունը ղեկավարում է Լիսաբոնում գտնվող մայր գրասենյակից: Այն գրասենյակներ ունի նաև Լոնդոնում ու Փարիզում և դասվում է Եվրոպայի տասը ամենամեծ հիմնադրամների շարքին:

Հիմնադրամն ունի թանգարան, որտեղ պահվում է Հիմնադրի արվեստի գործերի հարուստ հավաքածուն: Ունի նաև ժամանակակից արվեստի գործերի հավաքածու, դասական երաժշտության նվագախումբ և երգչախումբ, գրադարան և արխիվ, գիտահետազոտական ինստիտուտ և ընդարձակ այգիներ Լիսաբոնի կենտրոնում: Հիմնադրամի գործունեության շրջանակում կազմակերպվում են համերգներ, ցուցահանդեսներ, գիտաժողովներ և տրամադրվում են դրամաշնորհներ կրթական ու մշակութային նախաձեռնություններին:

Ստեղծման օրվանից՝ Հիմնադրամն աջակցում է աշխարհի տարբեր վայրերում գտնվող հայերին: Ունի Հայկական բաժանմունք, որը դրամաշնորհներ է տրամադրում հայ և հայագիտությամբ զբաղվող ուսանողներին, աջակցում է գիտահետազոտական նախագծերին, օժանդակում սփյուռքում գտնվող դպորցներին, ֆինանսավորում արևմտահայերենի զարգացման ծրագրերը, դրամաշնորհներ հատկացնում նաև Հայաստանի քաղաքացիական հասարակության կազմակերպություններին և խրախուսում հայ-թուրքական երկխոսությունը:

«Մաշտոց» հայ մշակույթի պահպանման և զարգացման հիմնադրամը ստեղծվել է 2015 թ. ամերիկահայ բարերարներ՝ Մարիա, Բեատրիս և Ռուբեն Ղրդյանների ֆինանսավորմամբ:

Հիմնադրամի գործունեությունն ուղղված է Մատենադարանի կրթական, գիտական և մշակութային ծրագրերի զարգացմանը, երիտասարդ գիտնականների և ասպիրանտների օժանդակմանը, ինչպես նաև Մատենադարանի հանրահռչակմանն ուղղված ծրագրերի իրականացմանը:

The Armenian Scriptoria Map relies on various open source, free javascript libraries including Leaflet. We never get/store any information regarding your visit to the site. Please enable javascripts and try again.